Naxçıvan Muxtar Respublikası Təhsil Nazirliyinə birbaşa tabe məktəblər və Naxçıvan şəhər ümumtəhsil məktəblərində Xocalı soyqırımı ilə əlaqədar tədbirlər təşkil olunub. Naxçıvan şəhər 3, 4, 5 və 6 nömrəli tam orta məktəblər üzrə 15 şagirdin iştirakı ilə Xatirə Muzeyində Xocalı soyqırımı ilə əlaqədar açıq dərs keçirilmişdir.
Naxçıvan şəhər 6 nömrəli tam orta məktəbin tarix müəllimi Azad Şirzadov “Xocalı soyqırımı” mövzusunda keçdiyi açıq dərsdə bildirmişdir ki, Xocalı soyqırımı Azərbaycan tarixinə ən dəhşətli və faciəli səhifələrdən biri kimi daxil olmuşdur. Azərbaycan xalqı tarixi torpaqlarından qovulmuş, qaçqına, məcburi köçkünə çevrilmiş və bütün bunlar ermənilər tərəfindən törədilmiş kütləvi qırğınlarla müşayiət olunmuşdur.
Sədərək rayon ümumtəhsil məktəbləri və məktəbdənkənar tərbiyə müəssisələrində Xocalı soyqırımının 29-cu ildönümünə həsr edilmiş tədbirlər keçirilib. Belə ki, Sədərək kənd 2 nömrəli tam orta məktəbdə məktəblilərə vətənpərvərlik hisslərinin aşılanması məqsədilə Xocalı soyqırımı qurbanlarının əziz xatirəsinə həsr olunmuş Azərbaycanın Milli Qəhrəmanı Əlif Hacıyev haqqında “Xocalının Əlifi” adlı sənədli film nümayiş etdirilib.
Ordubad rayon məktəblərində Xocalı soyqırımının 29-cu ildönümünə həsr edilmiş bir sıra tədbirlər təşkil edilmişdir. Belə ki, Ordubad Rayon İnternat tam orta məktəbinin X sinif şagirdlərinə Məmməd Tağı Sidqinin ev muzeyində Xocalı soyqırımı ilə əlaqəli açıq dərs keçirilmişdir. Dərsdə məktəbin tarix müəllimi Şərafət Babayeva Xocalıda törədilən erməni vəhşiliyi və bunun dəhşətləri barədə şagirdlərə tarixi faktlarla geniş məlumat verib.
Kəngərli Rayon Təhsil Şöbəsinin təşkilatçılığı ilə rayon məktəblərində Xocalı faciəsinin 29-cu ildönümünə həsr olunmuş tədbirlər keçirilmişdir. Bu gün Yurdçu kənd tam orta məktəbində “Xocalı - bir millətin kədəri” adlı sənədli film nümayiş olunub.
Şahbuz rayon ümumtəhsil məktəblərində də Xocalı soyqırımının 29-cu ildönümü ilə əlaqədar tədbirlər keçirilmişdir.
